Kanë dale detaje të reja nga ngjarja e rëndë që ndodhi mbrëmjen e kësaj të enjteje në afërsi të Rinasit. Një person me precedentë penalë i identifikuar si Klajdi Buza, 34 vjeç ka hapur zjarr me αrmë drejt një patrulle të policisë.
Sipas të dhënave, policia e Tiranës kishte marrë informacion për një person të armatosur në këtë zonë. Pas informacioneve në rrugë operative, efektivët e Tiranës organizuan operacionin për kapjen e tij.
Në momentin që efektivët i janë afruar, i riu ka qëlluar me armë zjarri në drejtim të policisë duke u rrezikuar jetën.
Sipas të dhënave të policisë, Klajdi Buza është arrestuar edhe në vitin 2022, pasi lëvizte i armatosur në rrugët e qytetit të Krujës me një automjet tip Porche. Me vete kishte një pistoletë gati për qitje. 
Në vitin 2015, Klajdi Buza denoncoi vjedhjen e makinës së tij “BMW X5”. Policia njoftoi në atë kohë se automjeti i tij ishte gjetur i braktisur në vendin e quajtur “Ura e Gjolës” në Fushë Krujë.
“Shërbimet e Forcës Operacionale të DVP Tiranë pasi kanë marrë informacion për një shtetas i cili mbante armë zjarri në subjektin e tij kanë organizuar punën me qëllim kapjen dhe vënien përpara përgjegjësisë ligjore. Gjatë ndalimit të shërbimeve të Policisë në subjektin e tij privat në Rinas, shtetasi i identifikuar me inicialet K. B, ka qëlluar në drejtim të Policisë nga brenda subjektit të tij.
Nga të shtënat nuk ka pasur të lënduar. Shërbimet e Policisë kanë bërë të mundur neutralizimin e tij dhe shoqërimin për në ambientet e DVP Tiranë. Në përfundim të veprimeve specialistët për Hetimin e Krimeve të Rënda kanë bërë arrestimin e shtetasit K. B., 34 vjeç, banues në Tiranë. Në cilësinë e provës materiale u sekuestrua arma e zjarrit dhe municion luftarak. Materialet i kaluan Prokurorisë, për veprime të mëtejshme procedurale” – thuhet në njoftim. ©LAPSI.al
