“Dua të them një bravo dhe komplimente çunave për shpirtin që treguan. Kishim punuar gjatë javës, punuam mbi psikologjinë, ato që thamë i realizuam të gjitha. Kishim durim në qarkullimin e topit dhe vertikalizimin. Në pjesën e dytë me dy gola individuale të Entoni dhe Kaçorrit fituam ndeshjen, kjo është për të gjithë çunat dhe për ne, nisja e mbarë gjysma e punës". Arjan Bellai ia atribuon skuadrën fitoren në debutim 2-0 kundër Kastriotit, në aventurën e tij të parë si trajner në Superiore. "Mua më pëlqen ky kampionat tani, në Greqi ia vlen vetëm Superliga 1, se Superliga 2 është mbrapa. Në Superiore punojnë shumë me infrastrukturën, kishte me bar jeshil. Të gjitha fushat janë të shkëlqyera, mund të luash futboll, jo si në kohët e shkuara ku nuk mund të luajë e bëjë kontroll në fushën e lojës" vlerësoi Bellai.
Sigurisht për të përcaktuar objektivat nuk është e thjeshtë dhe një javë nuk është kurrësesi tregues: "Objektivin nuk mund ta flasësh për një ndeshje se janë 35 ndeshje e 35 javë dhe çdo ekip do të ketë ulje dhe ngritjet e veta, E mira është që fituam dhe fituam me lojë të mirë, kjo është kryesorja - tha tekniku, duke shtuar -. Edhe presidenti është me këmbë në tokë, nuk fluturon, mbijetesa është kryesore se ka shumë që luftojnë. Jemi ekip me të rinj, Ballshi ka politikën që luan me të rinj dhe do të mundohemi që të futim të rinj që të fitojnë eksperiencën për qëllimet për të ardhmen. Edhe objektivi im e i presidentit nuk mund të themi që jemi për kampionat, vijmë nga kategoria e dytë dhe sigurisht mbijetesa është e para”, përfundoi Bellai.
