Ka shumë kombëtare me të cilat statistikat janë negative, por ato me Hungarinë kanë mes tyre jo vetëm faktin e asnjë fitore në histori, por edhe rezultatin rekord të një humbje në arenën ndërkombëtare, edhe pse bëhej fjalë për një miqësore. Shqipëria përballet kështu pasditen e sotme (ora 18) jo vetëm me një kundërshtar të fortë të Grupit I, por edhe me ata që kemi 73 vjet që nuk i shkëpusim dot një barazim.
STATISTIKAT
Nga 20 gushti i vitit 1947 kur Hungaria e Shqipëria u përplasën për herë të parë në Kupën e Ballkanit nisi edhe kalvari i humbjeve me një 3-0 të pastër, që do ta pasonin edhe 5 të tjera në 6 ndeshje në total. Pikërisht kështu, sepse vetëm ndeshja e kthimit e Kupës së Ballkanit përfundoi 0-0 në 'Qemal Stafa', nga atje vetëm humbje. Mes tyre edhe ajo katastrofike 12-0 në 24 shtatorin e vitit 1950, fatmirësisht në një miqësore.
FORMACIONI
Një lloj hapje për modifikim moduli në konferencën për shtyp, por vetëm për pak caste, sepse në pyetjen e tretë Reja u kthye sërisht tek 3-5-2 që lojtarët e tij 'e kanë memorizuar symbyllur'. Berisha në portë është i sigurtë, ndërsa edhe treshja difensive nuk do të ndryshojë me Ismajli-Gjimshiti-Kumbulla. Dilema më e madhe është në lidhje me krahun e djathtë të mbrojtjes, ky mungon Hysaj i skualifikuar. Albi Doka do të ishte zëvendësuesi ideal i anësorit të Lazios, por kritikat për mbajtjen jashtë të lojtarëve ofensivë, mund ta bëjë Rejan ti besojë këtë ndeshje Odise Roshit. Ndeshja nën ton e Bares e kartoni i verdhë me Poloninë që e skualifikoi, ishte si një asist për Nedim Bajrami, i cili është në formë të mirë dhe i gatshëm për të dhënë kontributin e tij në debutimin me fanellën kuqezi. Pjesa tjetër asnjë ndryshim, përvec faktit që Uzuni është lajmëruar në konferencë për shtyp se do të luajë në krah të Cikalleshit.
Formacioni i mundshëm: Berisha, Roshi/Doka, Ismajli, Kumbulla, gjimshiti, Trashi, Gjasula, Bajrami, Abrashi, Çikalleshi, Uzuni.
DËMTIMET
Një ndeshje problematike në këndvështrimin e teknikut Reja, duke qenë se italiani duhet të gjejë formulën e duhur për të zëvendësuar tre titullarë të skualifikuar në ndeshjen me Poloninë. Bare, Hysaj e Manaj nuk do të jenë, por ajo që shqetëson Rejan është kondicioni fizik i Sokol Çikalleshit. Sulmuesi është i padiskutueshëm për trajnerin, por ai ka shfaqur një problem në gju në stërvitjen e fundit e kështu situata e tij po monitorohet me kujdes. Nëse golashënuesi më në formë i kombëtares nuk ia del, atëherë do të jetë Balaj, që do ta nisë si titullar sfidën.
GRUPI I
Shqipëria në katër ndeshjet e para ka marrë dy humbje e dy fitore e me gjashtë pikë ndjek pikërisht Hungarinë, me të cilën do të ndeshet e Poloninë, që e mundi 4-1. Të dy rivalët e kuqezinjve kanë 7 pikë, ndërsa kryeson renditjen Anglia me pikë të plota 12. San Marino e Andorra janë skuadra ku askush nga pretendentët nuk ka lënë pikë.
