Kjo e enjte shënoi ditën më të nxehtë të këtij viti. “Vala e ferrit” siç e cilësojnë sinoptikanët të nxehtin afrikan që ka pushtuar të gjithë Europën shënoi një rekord prej 42 gradësh në qytetin e Kuçovës. Thuajse në të njëjtat nivele, me 41 gradë ishte edhe Shkodra, Elbasani, Berati e Gjirokastra.
“Pothuajse gjithë ultësira perëndimore është luhatur nga 38.3 deri në mbi 40. Në të vërtetë kemi temperaturë afërsisht 40, por e kemi ndjerë si 46 gradë dhe ka qenë një ajër mbytës” – tha sinoptikania Lajda Porja në Tv Klan.
Shpëtim nga temperaturat ekstreme nuk do të ketë as të premten.
“Nesër pritet një rënie e lehtë, thuajse e papërfillshme dhe kjo vetëm në veri të vendit, pra rënie me 0.1 ose 0.2 gradë që nuk ndjehet fare. Rënie pritet vetëm në fundjavë me të paktën 3 deri 4 gradë” – tha Porja.
Ndërkohë Instituti i Gjeoshkencave, Energjisë, Ujit dhe Mjedisit ka paralajmëruar se për shkak të temperaturave të larta që kanë përfshirë vendin ka rrezik të lartë zjarresh, sidomos në qarqet Fier dhe Berat.
