Në disa televizione dhe portale të cilat janë nën ndikimin direkt të Bashkisë së Tiranës është shpërndarë sot lajmi se abonetë do të rikthehen shumë shpejt për udhëtarët e linjave urbane. Lajmi nuk citon asnjë burim të Bashkisë së Tiranës dhe bie ndesh me planifikimin që kishte bërë Erion Veliaj për ta anuluar abonenë e përgjithshme për 3 muajt e verës.
Mbetet për t'u verifikuar nëse "burimet" janë të sakta kësaj here, apo kjo është një lojë organizuar nga Erion Veliaj për të pakësuar radhët e protestuesve nesër para Bashkisë së Tiranës. Protesta është organizuar nga Organizata Politike që disa ditë më parë nisi një peticion në kryeqytet për rikthimin e aboneve. Më shumë se 10 mijë qytetarë nënshkruan peticionin brenda pak ditësh dhe gjasat janë që shumë prej tyre të jenë nesër në orën 17:00 para bashkisë për të kundërshtuar anulimin e aboneve.
