Kryetari i Partisë "Bindja Demokratike", Astrit Patozi ka shkruar në rrejtin social "Facebook" se të 153 kandidatët e partisë së tij do të verifikohen për pastërti të figurës te Autoriteti për Informimin mbi Dokumentat e ish-Sigurimit të Shtetit.
Ai shkruan, se partia e tij është e vetmja që i është drejtuar deri më tani këtij autoriteti për të verifikuar kandidatët për deputetë.
"Partia Bindja Demokratike ka dërguar sot listat e kandidatëve për deputetë në Autoritetin për Informimin mbi Dokumentat e ish-Sigurimit të Shtetit.
Ajo ka kërkuar informacion për të 153 kandidatët e saj, sa i përket të shkuarës dhe lidhjeve të mundshme të tyre me Sigurimin e Shtetit.
Në hartimin e ekipit të kandidatëve të saj Bindja Demokratike ka synuar të ketë një listë me individë të paakuzuar ndonjëherë për afera korruptive, të pacënueshëm nga ligji i dekriminalizimit dhe të pastër sa i përket të shkuarës komuniste.
Nëse në përgjigjen e Autoritetit të Dosjeve, rezulton që ndonjëri prej tyre ka patur lidhje me strukturat e Sigurimit të Shtetit, kandidati në fjalë do të përjashtohet nga lista e kandidatëve të partisë në zgjedhje.
Bindja Demokratike është e vetmja parti që i është drejtuar deri më tani këtij autoriteti për të verifikuar kandidatët për deputetë", shkruan Patozi në rrjetin social Facebook.
