Ish-ministri i mjedisit, Lefter Koka ka publikuar një foto me ish-kryeministrin socialist Fatos Nano. Është e paqartë se ku janë takuar, por ajo që bie në sy nga fotoja e publikuar dhe mesazhi i Kokës është se ky i fundit e ka vendosur tashmë të braktisë përfundimisht LSI-në dhe të garojë për PS-në. Nano është zhdukur prej kohësh nga jeta publike dhe politike ndërsa shihet se është thinjur mjaft dhe ka shtuar në peshë.
“Miqtë e vërtetë dhe vera e vjetër janë të vetmet që nuk të lodhin kurrë! Ritakohem çdo herë me të njëjtin mall dhe intensitet me mikun tim sa me vlera po aq dhe të mençur. E majta shqiptare është sot kjo forcë progresiste falë Fatosit, filozofisë së tij politike për një shoqëri të hapur demokratike dhe pa diskutim mbështetja e tij do të na ndihmojë për të vazhduar kontributin për Shqipërinë tonë dhe rrugëtimin e pandalshëm euro-atlantik. #PS3”– shkruan Koka.
Ky i fundit nuk e dogji mandatin e deputetit duke u ndarë me LSI-në dhe tashmë duket se është afruar në radhët e socialistëve. Në kohën e qeverive të Nanos ai ka mbajtur detyrën e kryebashkiakut të Durrësit. ©LAPSI.al
https://www.facebook.com/lefterkokapolitikan/posts/3955063377841730
