I dërguari i posaçëm i Bashkimit Europian për dialogun, Miroslav Lajçak ka deklaruar sot se nuk do të ketë një marrëveshje finale ndërmjet Kosovës dhe Serbisë, pa përfshirjen e asociacionit të komunave serbe. Në një konferencë për shtyp, në përfundim të vizitës së tij në Kosovë, diplomati sllovak ka thënë se marrëveshja për themelimin e asociacionit është arritur në vitin 2013, por ka mbetur të diskutohet statuti i saj.
“Nëse nuk ka marrëveshje nuk ka normalizim e nuk do të ketë marrëveshje pa asociacion. Ne nuk kërkojmë ta rihapin tekstin, por vetëm të implementojnë atë çka është nënshkruar. Gjithçka çka është dakorduar, duhet të implementohet”, tha Lajçak. Gjatë vizitës treditore në Kosovë i deleguari i BE-së është takuar me krerët e institucioneve shtetërore dhe të partive politike, duke përfshirë këtu edhe komunitetet. Pas Kosovës, ai do të shkojë sonte për vizitë në Serbi.
