Me tone të ashpra kryedemokrati Lulzim Basha ka shprehur kritika ndaj SPAK-ut për të cilën thotë se ka dështuar totalisht për të parandaluar krimin e organizuar. Kreu i PD-së thotë se SPAK duhet që të nisë menjëherë hetimet për krimin shtetëror mbi çështjen e inceneratorëve. Ai thotë se duhet që prokurorët duhet të japin dorëheqjen nëse nuk nisin hetimet për aferën 400 milionëshe.
"Mafia e inceneratorëve që ka në përbërje Edi Ramën, Arben Ahmetajn, Erion Veliajn vazhdon të marrë miliona euro. Kjo bandë, ky grup i strukturuar kriminal, ka shtrirë tentakulat në një numër të madh mediash. Refuzoni paratë e mafiave. Nuk është kurrë vonë për të refuzuar këtë mëkat, haram. Paratë e shqiptarëve në kohë pandemie janë në xhepat e tyre., Vetë Ministria e Financave në një raport të publikuar tregon qartë që vetëm një përqindje e vogël e parave që kanë marrë nga qytetarët shqiptarë është raportuar si e investuar. Në mes të pandemisë vjedhin haptazi. Dhe KLSh ka konstatuar të njëjtën gjë. Këto janë çështje për SPAK. Po i drejtohem strukturës antikorrupsion, justifikoni ekzistencën tuaj. Keni marrë miliona nga taksapaguesit shqiptarë dhe europian. I bëj thirrje të nisë urgjentisht hetimet për mafian e plehrave. Ky është raporti i KLSh-së për inceneratorët për mafian e plehrave", tha Basha.
