Partia Demokratike vijon të sjellë dëshmi nga një familje, të cilën ish-deputetja Grida Duma e ka cilësuar si simbol të propagandës së kryeministrit Edi Rama, gjatë periudhës kur në fokus ishin dëmet e shkaktuara prej tërmetit në familjet shqiptare. Bëhet fjalë për familjen Cakoni. Manjola dhe Alesio nga Thumana janë dy të mbijetuarit e vetëm nga familja e tyre që dikur përbëhej nga 4 pjesëtarë.
Manjola, e cila nga tërmeti i 26-nëntorit humbi bashkëshortin dhe vajzën 15-vjeçare tregon se e ka përjetuar rëndë intervistën e saj televizive, ku rrëfen se është braktisur nga shteti duke mos patur një strehë apo pension për të birin. Në denoncimin e radhës të Manjolës, ajo sjell një pretendim të ri, kërcënimin e drejtëpërdrejtë të kryeministrit Edi Rama, i cili sipas saj e ka quajtur një turp dëshminë e dhënë publikisht për mediat.
“Dje dola në televizor dhe tregova hallin tim, shqetësimin tim për vete dhe për fëmijën tim. Dhe kur pashe veten aty u ndjeva shumë keq, dhe pastaj kam shkuar në spital. Shkova në spital. Rrugës kur po vija nga spitali, më merr në telefon dikush nga kryeministria. Përgjigjet mami im, se unë isha e sëmurë dhe i thotë:” Turp të ketë Manjola!” “Turp të ketë Manjola!” Unë nuk besoj se kam bërë ndonjë turp. Kam kërkuar të drejtën time dhe për fëmijën tim. Asnjë gjë tjetër s’dua. Vetëm dua të drejtën time, për vete dhe për fëmijën tim dhe kaq. Ai i kishte thënë: “Edi jam. Edi Rama jam. ”Turp të ketë Manjola për atë që ka bërë sot. ”Unë isha e sëmurë isha me serum, isha shumë keq. Se po të isha në rregull do t’i thoja: Unë nuk kam bërë ndonjë turp, turp ke bërë ti, që më le mua më çove deri në këtë pikë. Sa të arrijë edhe të shkoj në spital. Ndoshta do që të vdes dhe unë dhe të bëhemi tre viktima tamam edhe t’i japësh lekë djalit tim. Kaq kisha”, tregon Manjola.
