Në Continassa kanë rinisur zyrtarisht stërvitjet individuale e Juventus ka shpejtuar të thërrasë në bazë të gjithë të huajt që ishin larguar nga Italia gjatë emergjencës Koronavirus. Pas Pjanic, Cristiano Ronaldo e Khedira, edhe De Ligt e Szczesny janë kthyer në Torino e në ditët e ardhshme duhet të mbërrijnë edhe të tjerët, përfshirë Higuain. Duke përjashtuar të paparashikuarat e lidhura me fluturimin, sipas Tuttosport, Pipita pritet në Torino në fund javë.
Në Argjentinë Higuain ka qendruar me familjen pranë së ëmës së sëmurë e në javët e fundit ishin krijuar fjalë rreth një "rezistence" të tij për të mos u kthyer në Torino. Zëra që tani, me rikthimin e planifikuar të sulmuesit në Itali, duket se do të mbyllen në pritje të zhvillimeve të mëtejshme mbi të ardhmen e tij me bardhezinjtë. E ardhme për të cilën do të mendojë pasi të ketë mbyllur sezonin.
Në Continassa, në fakt, ndërkohë ka nisur numërimi mbrapsht në vigjilje të seancave në grup që duhet të rinisin në 18 maj. Por e gjitha pa nxitim e në pritje të sigurive mbi kohët eventuale të rifillimit të kampionatit. Përvec Higuain, jashtë Italisë për momentin janë edhe Douglas Costa, Danilo, Alex Sandro e Rabiot. Sapo të kthehen në Torino, të gjithë futbollistët që kanë ardhur nga jashtë do ti nënshtrohen një izolimi 14 ditor.
