Presidenti i Republikës Ilir Meta do të mbledhë mesditën e së mërkurës Këshillin e Sigurisë Kombëtare. Në një intervistë për emisionin “Përballë” në RTSH, Meta tha se do të respektohet edhe distanca.
“Do të ketë në konsideratë situatën e veçantë dhe respektimin edhe të distancave sociale për këtë rast” - tha Meta.
Por pse e thirri Meta Këshillin e Sigurisë Komëbëtare.
“Bashkëpunimi ka qenë i vazhdueshëm për përballimin e kësaj sfide të re dhe tërësisht të pazakontë. Tani është momenti për të diskutuar edhe një herë, jo vetëm për masat e marra deri tani, por edhe rreth parashikimit mbase për një plan më afatgjatë, në varësi me skenarët e zhvillimit të kësaj pandemie në nivel kombëtar por edhe ndërkombëtar.
Njëkohësisht do përqendrohemi edhe tek skenarët e ndikimit në ekonomi, në jetën sociale, në mënyrë që në çdo aspekt të jemi sa më të mbrojtur dhe të dalim nga kjo situatë e jashtëzakonshme me sa më pak pasoja, si për sa i takon shëndetit të qytetarëve tanë, por edhe ekonomisë tonë kombëtare dhe familjare” – tha Meta. ©LAPSI.al
