Kryeministri izraelit, Benjamin Netanyahu ka deklaruar ditën e sotme se Izraeli është gati t'i përgjigjet çdo sulmi të ri nga Irani. Gjatë një deklarate të shkurtër për mediat, Netanyahu tha se Irani dhe Hezbollahu tani janë në një pozitë më të dobët se kurrë, ndërsa Izraeli është më i fortë se kurrë. Kjo duke theksuar se lufta e Izraelit kundër tyre nuk ka mbaruar ende.
Kryeministri izraelit tha se Teherani dhe Hezbollahu ishin përpjekur t'i impononin një ekuacion të ri Izraelit, duke e quajtur një zhvillim të papranueshëm dhe të patolerueshëm. Ai tha gjithashtu se nëse ka sulme të mëtejshme kundër Izraelit nga Irani, atëherë qeveria e tij do të reagojë fuqishëm dhe do të ushtrojë të drejtën e vetëmbrojtjes.
Mediat shkruajnë se Netanyahu gjithashtu pretendoi se forcat izraelite vazhdojnë të shkatërrojnë infrastrukturën e grupit brenda zonës së sigurisë, duke përfshirë objekte të mëdha nëntokësore në vargmalin malor Beaufort në Libanin jugor.
"Ne vazhdojmë të shkatërrojmë të gjithë infrastrukturën e tyre terroriste në zonën e sigurisë, duke përfshirë objektet e mëdha nëntokësore në rajonin Beaufort. Ato janë aq të mëdha sa nuk kam parë kurrë diçka të tillë", tha kryeministri izraelit.
