Cristiano Ronaldo kundër Atletico Madrid duhet të kthehet në fushë me fanellën e Juventus. Dëmtimi që e persekutonte nuk është lënë ende plotësisht pas shpine, ashtu si ka pranuar tekniku Maurizio Sarri në vigjilje të sfidës së Champions, por portugezi është stërvitur me shokët. Para nisjes së seancës stërvitore në Continassa, zhvilluar me grupin e plotë, Sarri e CR7 kanë folur gjatë së bashku, me shumë mundësi për gjendjen fizike të portugezit.
"Raporti im me lojtarin është i mirë - ka thënë tekniku në konferencën për shtyp para ndeshjes së Champions - Nëse një lojtar i imi nervozohet për një zëvendësim, jam i lumtur, sidomos për një lojtar që ka fituar gjithcka, do të thotë se ka ende motivime të forta. Cristiano ka kryer stërvitjen me shokët dhe është në rritje, por nuk e di nëse e kemi zgjidhur përfundimisht problemin".
