Bota e futbollit në këto orë po flet vetëm për Gabriel Barbosa (Gabigol), heroi autentik i Flamengo në finalen e Kupës Libertadores kundër River Plate në Lima që, falë një dygolëshi në minutat e fundit të ndeshjes, i dhuroi trofeun klubit rubro-negro. Por ka edhe nga ata që nuk duan të ndjekin turmën, duke shkruar kundër rrymës e duke i kujtuar brazilianit kohët kur luante për Inter. Eshtë një person që Gabigol e njeh shumë mirë: Frank de Boer, që e ka stërvitur për disa javë me zikaltrit.
I ftuar i Fox Sports, hollandezi, tani trajner i Atlanta United në MLS, ka shprehur gjykimin e tij tepër negativ për brazilianin: “Nuk kisha dëgjuar shumë për të, por thoshin se ishte një lojtar fantastik. E quanin Gabigol, por ne e quanim Gabi-jo-gol. Erdhi tek ne me dy persona, një përgjegjës për mediat sociale e një tjetër si truprojë, por nuk bëri asgjë“.
