Një operacion i gjerë policie po zhvillohet në këto momente në zonën e Niklës pranë Fushë Krujës. Burime të lapsi.al thanë se drejt kësaj zonë kanë udhëtuar forca të shumta të policisë të mbështetura nga Reparti i Forcave të Ndërhyrjes së Shpejtë dhe RENEA.
Të njëjtat burime thanë se dyshohet se autorët që qëlluan mbi prokurorin dhe 2 personat e tjerë në makinë janë fshehur në këtë zonë. Flitet se një person është ndaluar, por nuk jepet identiteti pasi hetimet vazhdojnë.
Atentati ndodhi pasditen e së premtes në teksa prokurori Arjan Ndoja po udhëtonte me dy persona të tjerë në automjetin tip “Benz” të llojit fuoristradë me targa ‘AA 333 ZD’, pranë Mbikalimit të Shkozetit. Bashkë me Ndojën u plagos rëndë shoferi i prokurorit, Andi Maloku 30 vjeç dhe Aleksandër Laho, i cili ishte pasagjer.
Laho njihet ndryshe edhe si Landi Muharremi dhe si “i forti i Sukthit”. Muharremi ishte një prej personave që u akuzua si i përfshirë në rrahjen e biznesmenit libanez, Faad Mitri. Ky i fundit u dhunua barbarisht më 10 shtator të 2016-s për një konflikti pronësie në Gjirin e Lalëzit. ©LAPSI.al
