Ernest Gjoka është trajneri i ri i Shkëndijës së Tetovës, që i beson eksperiencës dhe mentalitetit fitues të teknikut kryeqytetas për tu kthyer në majën e futbollit maqedonas, pas një starti shumë të dobët të kampionatit. Tetovarët janë në vendin e gjashtë me 11 pikë, pas barazimit me Vardar në javën e fundit, e Gjoka duhet ti japë një impuls tjetër skuadrës për të rikuperuar hendekun prej 9 pikësh që i ndan me kryesuesit.
Në klubin e Maqedonisë së Veriut, 49 vjeçari do të zëvendësojë një personalitet si Qatip Osmani, që ka kontribuuar fort në ngritjen e reputacionit të klubit tetovar. Gjoka bëhet kështu, trajneri i pestë nga Shqipëria që drejton tetovarët, pas Bexhet Shehut, Edmond Mihajt, Saimir Dautit dhe Shpëtim Duros, por duhet të sfidojë Vardarin kryesues në të dy kompeticionet, sepse edhe në Kupë për të arritur cerekfinalet e kompeticionit niset nga 2-2 i ndeshjes së parë në Shkup.
Zgjedhja e Gjokës është bërë mbi bazën e sukseseve që ka patur tekniku në pankinën e Kukësit, pavarësisht se eksperiencat janë mbyllur kaq me Blutë pas aventurave europiane. Drejtuesit e Shkëndisë kanë patur parasysh titullin e parë kampion në historinë e Kukësit, pikërisht nën drejtimin e Gjokës dhe në aventurën e dytë triumfin në Kupën e Shqipërisë. Një arritje e rëndësishme për teknikun, që në karrierën e tij në Superiore ka drejtuar edhe Apoloninë, Tomorrin, Flamurtarin, Kamzën e Vllazninë, e që tani duhet të provojë veten përtej kufijve të Shqipërisë.
