DeMarcus Cousins është zyrtarisht në telashe. Policia e Mobile, Alabama, ka nxjerrë një mandat arresti për qendrën e Lakers, i akuzuar për dhunë në familje, pas denoncimit të bërë nga ish-e fejuara për kërcënim telefonik. “Po, ka një mandat arresti për të” konfirmoi për Usa Today një zëdhënës i qytetit në të cilin Boogie ka lindur e është rritur.
Cousins është denoncuar në ditët e kaluara nga Christy West, nënë e djalit 7 vjecar të basketbollistit. Në një telefonatë të regjistruar nga gruaja, e publikuar të hënën në faqen Tmz, lojtari i thotë “të fus një plumb në kokë”, si pasojë e një debati në telefon, pasi lojtari kërkonte me insistim nga gruaja të lejonte të birin të merrte pjesë në martesën e tij, që u zhvillua të shtunën në Atlanta. West e ka denoncuar Cousins për kërcënim në policinë e Mobile, duke dorëzuar edhe regjistrimin telefonik, duke kërkuar një urdhër kufizimi për basketbollistin, që kishte edhe në të shkuarën një denoncim për tentativë mbytje.
Cousins nuk e ka komentuar, por ky mandat arresti vetëm sa e rëndon pozicionin e tij. Si Lakers, me të cilët rrezikon të mos luajë në 2019-20 për dëmtimin e kruciatit të gjurit të majtë, ashtu dhe Nba kanë hapur hetim mbi ngjarjen: nëse Cousins do të konsiderohet përgjegjës se ka thyer politikën e Nba/Nbpa mbi dhunën në familje, rrezikon një pezullim. Përvec pasojave ligjore.
