“Lapsi.al” ka siguruar një foto të 26-vjeçarit Santiago Malko, ish-policit që u ekzekutua mbrëmjen e djeshme me 10 plumba në zonë e Xhamllikut në Tiranë.
Sikurse është raportuar më herët bazuar në njoftimet e Policisë, Malko ka qenë duke udhëtuar me automjetin e tij tip “BMË X5”, kur një furgon me ngjyrë të bardhë i ka zënë pritë e ndërsa dy persona e qëlluan me breshëri kallashnikovi nga një automjet tip “Mercedez Benz”. Ish-polici për pasojë ka humbur drejtimin e mjetit që është përplasur me murin e një lavazhi.
Më pas atentatorët i janë afruar automjetit të Malkos, për të qëlluar ish-efektivin me plumb në kokë, duke e lënë të vdekur në vend. Pak orë pas ekzekutimit mafioz, në një makinë të djegur në Ferraj u gjet edhe një armë e llojit kallshnikov, që dyshohet se u përket autorëve.
Ndërkohë, Policia ka identifikuaur një prej personave që dyshohet se mori pjesë në atentat, shtetasin me iniciale D.A., i cili është shpallur në kërkim. Paralelisht, ditën e sotme janë shoqëruar 10 persona që dyshohet të kenë lidhje me atentatin ndaj ish-efektivit.
26-vjeçari” ishte pjesë e bandës së Ervis Martinajt, i njohur ndryshe si “bosi” i lojërave të fatit. Malko ka qenë i përfshirë në ngjarjen e 4 tetorit të 2018-s, kur ndodhi vrasja e Fabian Gaxhës në zonën e ish-Bllokut, pas një përplasjeje me armë.
Gjithashtu, ish-polici i vrarë është përfshirë në një sherr me dy vëllezërit Lashi në vitin 2016 për një borxh prej 1 mijë eurosh.
Malko kishte përfunduar kursin për Patrullë të Përgjithshme dhe ka qenë pjesë e kësaj strukture në Policinë e Tiranës vetëm për 3 muaj, nga ku u tërhoq vullnetarisht.
