Katër anëtarët e zgjedhur nga Partia Socialiste në Komisionin Qendror të Zgjedhjeve (KQZ), Zv. Kryetari, Denar Biba dhe anëtarët: Bledar Skënderi, Edlira Jorgaqi dhe Rezarta Bitri, kanë thirrur zhvillimin e një mbledhjeje sot në orën 13:00, pavarësisht vendimit të Presidentit të Republikës, Ilir Meta, për çdekretimin e 30 qershorit si datë të paracaktuar për mbajtjen e zgjedhjeve lokale.
Mësohet se mbledhja do të ketë në rend ditë 5 pika mbi të cilat do të diskutohet dhe do të vendoset. Mes tyre përmendim: miratimin e listës emërore të shtetasve që mund të emërohen kryesisht anëtarë të KQV-ve, dhënien e autorizimit për ndryshimin e vendndodhjeve të disa QV-ve, miratimin e vëzhguesve afatgjatë të Institutit Demokratik Amerikan etj.
Në mbledhjen e mëparshme, katër anëtarët e KQZ-së refuzuan të zbatojnë dekretin e Metës, duke e quajtur atë si antikushtetues dhe të pavlefshëm. Dekreti i Presidentit ka hyrë në fuqi dhe është botuar në Fletoren Zyrtare një ditë më parë, por KQZ mesa duket do të vijojë punën në funksion të zgjedhjeve pa dekret, për të cilat mazhoranca është e vendosur që të zhvillohen me 30 Qershor.
Njoftimi i KQZ:
“Bazuar në nenin 22, pika 2, e Kodit Zgjedhor, nenin 12 të Rregullores “Për organizimin dhe funksionimin e Komisionit Qendror të Zgjedhjeve”, Zv. Kryetari z. Denar Biba, Anetaret; z. Bledar Skenderi, znj. Edlira Jorgaqi dhe znj. Rezarta Bitri kanë kërkuar thirrjen e mbledhjes,
Sot, me 12.06.2019, Ora 13:00, me rend dite:
“Për miratimin e listës emërore të shtetasve të cilët mund të emërohen kryesisht anëtarë KQV-ve, për zgjedhjet për organet e qeverisjes vendore të datës 30 qershor 2019”.
“Për dhënien e autorizimit për ndryshimin e vendndodhjeve të disa QV-ve, për zgjedhjet për organet e qeverisjes vendore të datës 30 qershor 2019”.
‘Për miratimin e vëzhguesve afatgjatë të Institutit Demokratik Amerikan ( NDI), për zgjedhjet për organet e qeverisjes vendore të datës 30 qershor 2019”.
“Për një shtesë në Vendimin nr.669, të datës 28.05.2019 ‘Për miratimin e vëzhguesve afatgjatë të KSHH’, për zgjedhjet për organet e qeverisjes vendore të datës 30 qershor 2019”.
“Për miratimin e vëzhguesve afatgjatë të Shoqatës për Gratë dhe Fëmijët, për zgjedhjet për organet e qeverisjes vendore të datës 30 qershor 2019”.
