Ka përfunduar mbledhja e kryetarëve të grupeve parlamentare të Kuvendit të Shqipërisë, ku është marrë vendimi që mocioni me debat për shkarkimin e presidentit të Republikës, Ilir Meta, do të zhvillohet në harkun kohor të 5 orëve në seancën e ardhshme të ditës së enjte.
Mësohet se debati do të jetë pika e parë e rendit të ditës dhe do të ndahet në mënyrë proporcionale mes grupeve parlamentare, mes të cilëve koha më e gjatë do t’i përkasë grupit të Partisë Socialiste. Kjo mbledhje e Konferencës së Kryetarëve vjen pas vendimit të kreut të shtetit për të çdekretuar 30 qershorin si datë për mbajtjen e zgjedhjeve lokale.
Kërkesa për mocionin ndaj presidentit Meta është miratuar me konsensus ndërmjet anëtarëve të mazhorancës dhe të opozitës së re parlamentare.
