Presidenti i Republikës, Ilir Meta, ka zhvilluar një takim me krerët e partive të vogla të Grupimit të Qendrës së Djathtë, Fatmir Mediun të Partisë Republikane (PR), Agron Dukën të Partisë Agrare Ambientaliste (PAA), Vangjel Dulen e Partisë Bashkimi për të Drejtat e Njeriut (PBDNJ) dhe Nard Ndokën e Partisë Demokristiane (PDK). Përmes njoftimit për shtyp të institucionit të Presidencës, bëhen me dije çështjet e aktualitetit politik të vendit të prekura në tryezën e bisedimit.
“Kreu i Shtetit shprehu shqetësimin se mosregjistrimi i të gjitha partive opozitare të legjislaturës së fundit parlamentare rrezikon jo vetëm standardet e zgjedhjeve, por edhe pluralizmin politik në vend.”- shkruhet në njoftimin e Presidencës. Mësohet se Meta ka vënë theksin tek domosdoshmëria e vendosjes së dialogut ndërpartiak, me qëllim parandalimin e përshkallëzimit të klimës së polarizuar politike.
Kreu i shtetit ka nënvizuar se asnjëherë nuk është vonë për të reflektuar dhe për të gjetur zgjidhje politike të negociuara bashkarisht, të cilat do të mund të rivendosnin normalitetin kushtetues, institucional dhe demokratik të vendit. “Kreu i Shtetit do të vazhdojë kontributin e Tij, me të gjitha format e mundësitë për të kërkuar reflektimin e të gjithëve, me qëllim garantimin, jo vetëm të bashkëjetesës demokratike, por edhe ecurinë e suksesshme dhe të besueshme të reformave të lidhura me integrimin europian.”- përmbyllet njoftimi.
