Komisioni i Pavarur i Kualifikimit ka konfirmuar në detyrë prokuroren e Prokurorisë së Korçës, Dhorina Theodhorin, e cila u vlerësua në seancën e sotme mbi kriterin e pasurisë, të pastërtisë së figurës dhe të aftësive profesionale. Trupa gjykuese përbehej nga kryesuesje Pamela Qirko, relatorja Genta Tafa Bungo dhe nga anëtarja Etleda Çiftja.
KPK-ja nuk konstatoi probleme në të dhënat e deklaruara të pasurisë, si edhe vlerësoi pozitivisht figurën e prokurores Theodhori. Ndërsa, kriteri i vlerësimit të aftësive profesionale shkaktoi debat në seancën dëgjimore, ku u mor në shqyrtim një nga gjashtë denoncimet e bërë nga publiku. Relatorja Bungo shpjegoi se në denoncimin në fjalë, një subjekt ngre pretendimin se pas një vendimi të prokurores Theodhori për mosfillimin e hetimit, është pezulluar tërheqja e një dosjeje nga Gjykata Civile. Sipas Bungos kjo ka ndodhur si pasojë e mosndjekjes së procedurave të duhura nga subjekti denoncues.
Në fund të fjalës së saj, kreu i Prokurorisë së Korçës kërkoi konfirmimin në detyrë. Vendimi i KPK-së u shpall në mesditë.
