Zv.ambasadorja e SHBA-së në vendin tonë Leyla Moses-Ones, ka kërkuar ditën e sotme që politika të bashkohet në të mirë të interesit publik.
E pranishme në një event ku kërkohej nxitja e punësimit të grave të prekura me kancer, ajo ka treguar dhe historinë e saj personale, ndërsa është përlotur, pasi ka humbur nënën 12 vite më parë nga kjo sëmundje.
“Diplomatët janë qenie njerëzore do doja të ndaja diçka thellësisht personale. 12 vjet më parë në këtë muaj humba nënën time për shkak të kancerit. Ne e dimë se diagnoza e kancerit është tragjike për familjen, asnjë punëdhënës nuk duhet të ndëshkojë gratë që luftojnë më ketë sëmundje të tmerrshme.
Studimi i bërë publik tregon mundësi për drejtuesit e Shqipërisë të punojnë bashkë për situatën e grave në Shqipëri, veçanërisht atyre me kancer në gji. Shpresoj që kjo do të jetë një fushë e përbashkët ku ju drejtuesit e politikës në Shqipëri të mblidheni bashkë.
Kur ju të bashkoheni në të mirë të publikut, do ta drejtoni këtë vend me frymëzim, ju gratë mund të jeni shembuj për të ardhmen dhe kolegët tuaj meshkuj. Koha është tani, mundësia është këtu, udhëheqësit duhet të punojnë bashkë për të dhënë shembull për shqiptarët, ndoshta edhe reformën zgjedhore. Të gjitha këto janë të mundura me bashkim”, tha kryediplomatja amerikane.
