Lulzim Basha kërkon që zgjidhja e krizës politike në vend të bëhet përmes ndërhyrjes së ndërkombëtarëve.
Basha deklaroi se zgjidhje për Shqipërinë si vend aspirant për në Bashkimin Europian do të ishte nëse do të implementohej ‘Raporti Priebe’, që shërbeu për tejkalimin e një krize serioze të demokracisë dhe sundimit të ligjit në Maqedoni në 2015.
“Monitorimi më efektiv i reformave të sundimit të ligjit në vendet që kërkojnë anëtarësim, mund të arrihet duke u mbështetur në shembullin pozitiv të të ashtuquajturit ‘Raporti Priebe’, i cili tashmë ndihmoi në tejkalimin e një krize serioze të demokracisë dhe sundimit të ligjit në Maqedoni në 2015. Komisioni Europian sapo ka nisur një nismë të re për raportimin e ‘Priebe’, për të monitoruar të gjithë sistemin e sundimit të ligjit në Bosnje dhe Hercegovinë. Unë inkurajoj Komisionin që të iniciojë një mision të tillë monitorimi edhe në Shqipëri”, deklaroi Basha.
MANDATET
Sipas kryetarit të opozitës, vendimi për djegien e mandateve ishte një akt ekstrem dhe me shumë risk, por Basha kujtoi se opozita nuk kishte zgjidhje tjetër përballë mungesës së Gjykatës Kushtetuese.
“Ne ndërmorëm një akt ekstrem, duke djegur mandatet, për t’u rënë kambanave të alarmit ndaj krimit dhe korrupsionit të lidhur me qeverinë. Për shtetin e së drejtës dhe të një shteti që lufton krimin dhe korrupsionin. Ky akt, sigurisht që ka riskun e tij, por mungesa e Gjykatës Kushtetuese nuk na la zgjidhje tjetër. Kërkojmë zbatim real të ligjit, jo fals, zgjedhje të vërteta dhe jo false, një Parlament ku qeveria jep llogari dhe jo një media të lirë dhe të pavarur, jo liri false. Kjo është diçka më shumë se zgjedhjet e radhës. Partia ime nuk ka lindur si parti e zakonshme, lindi si lëvizje e rinisë, ne nuk synojmë thjesht pushtetin, por dhënien fund të tranzicionit”, sqaroi kreu i PD-së.
INTEGRIMI
Duke iu referuar situatës në Shqipëri, Basha kujtoi se njerëzit kanë humbur besimin për shkak të lidhjeve të qeverisë me krimin. Njësoj si në protestat e opozitës, Basha theksoi se opozita nuk do të pranojë asgjë më pak sesa respektimin e standardeve europiane.
“Njerëzit kanë humbur besimin për shkak të lidhjeve të politikës me krimin. Objektivi ynë është të nxisim integrimin europian. Korrupsioni, në çdo nivel, përkeqëson situatën e demokracisë në vend. Ky është shansi i fundit për zgjidhje politike. Nuk ka rëndësi kush fiton zgjedhjet, por ato duhet të jenë të lira. Mjaft është mjaft. Nuk do të pranojmë më asgjë më pak sesa standardet europiane të demokracisë”, deklaroi Basha. Prej më shumë se dy muajsh, opozita është në protesta të vazhdueshme pas vendimit ekstrem të djegies së mandateve. Kërkesa e panegociueshme e opozitës së bashkuar është largimi i Kryeministrit Rama dhe krijimi i një qeverie tranzitore që të zhvillojë zgjedhje të lira dhe të ndershme në Shqipëri, shkruan panorama.
