Kreu i Agjencisë së Legalizimit, Urbanizimit dhe Integrimit të Zonave e Ndërtimeve Informale (ALUIZNI), Artan Lame, do të kryejë duke nisur nga dita e sotme edhe detyrën e drejtorit të Agjencisë Shtetërore të Kadastrës. Ky organ do të ketë si risi që këtej e tutje bashkimin e veprimtarisë së ALUIZNI-t me Hipotekat.
Lame u prezantua në cilësinë e re mëngjesin e sotëm nga Zëvendës Kryeministri, Erion Braçe, i cili u shpreh në deklarën për mediat se do të mbikqyrë personalisht mbarëvajtjen e Kadastrës, si edhe koordinimin e punës me institucionet e tjera. I vetëdijshëm për gabimet e panumërta në procesin e legalizimit, Lame pohoi problematikën që përbën çështja e pronave në Shqipëri. “Zgjidhja e çështjes së pronësisë mbetet thembra e Akilit sepse njerëzit vazhdojnë të therën e të vriten për prona. ” tha kreu i porsaemëruar i Kadastrës.
