Kryeministri Edi Rama ka prezantuar sot Safet Gjicin si kandidat të PS për Bashkinë e Kukësit. Gjatë turit “Bashkia që duam”, Rama u ndal sot në Kukës, ku kërkoi votën për socialistët në zgjedhjet vendore të 30 qershorit.
“Ja ku e keni kryetarin e Bashkisë. E gjeta këtu midis jush, nuk ua solla unë. Nëse nuk fitoni kampionatin, fitoni Bashkinë. Ka ardhur koha që të na jepni Bashkinë”, tha Rama.
Kreu i qeverisë iu referua edhe tarifës në rrugën e Kombit kur tha se qeveria gaboi dhe qytetarët kishin të drejtë. “Por të mos harrojmë se po investohet. Po ndërtohet njëra anë e rrugës e cila ishte e paplotësuar. Ndërtuan rrugë, por e lanë rrugëve. Shkoni në Kosovë, në anën tjetër rruga ka mbaruar”, shtoi ai.
Rama premtoi ndërtimin e aeroportit të Kukësi brenda 12 muajve, por edhe të stadiumit të ri ku do të luajë ekipi i futbollit. “Aeroporti do certifikohet shpejt për të nisur fluturimet”, tha ai.
