Një tjetër ftesë për dialog vjen nga Partia Socialiste. Pas kryeministrit edhe sekretari i përgjithshëm i PS i shtrin dorën opozitës , por jo për të ngeociuar mbi një qeveri tranzitore apo zgjedhjet e përgjithshme. Nga Pogradeci në takim me elektoratin për zgjedhjet vendore, Taulant Balla i ka bërë thirrje opozitës të reflektojë. Ai paralajmëroi se javën e ardhshme do të ketë emra të tjerë nga listat e PD dhe LSI që do të dorëzojnë formularin e dekriminalizimit në KQZ.
"Kuvendi ka legjitimitetin e duhur, se qeveria ka legjitimitetin e duhur dhe se jemi të gatshëm të dialogojmë me atë çfarë ka mbetur nga opozita në degradim. Kurrsesi ne nuk mund të bëjmë negociata në kurriz të demokracisë. Djem e vajza shqiptarë të përgjegjshëm për të ardhmen e vendit do të marrin përgjegjësinë e përfaqësimit në Kuvend. Besoj se java e ardhshme do të jetë një javë intensive në këtë drejtim", tha Balla.
Që pas 21 shkurtit kur opozita dorëzoi mandatet, në Parlament kanë zënë vend 4 deputetë të rinj që vijnë nga radhët e LSI-së, ndërsa 6 kandidatë të tjerë kanë dorëzuar formularin e dekriminalizimit në KQZ.
