Kreu i KLP-së, Gent Ibrahimi i është përgjigjur letrës së Edmond Spahos dhe Petrit Vasilit në lidhje me kërkesën e tyre për nisjen e një hetimi disiplinor për Prokuroren e Përgjithshme Arta Marku.
Opozita ka kërkuar hetimin e Markut për shkak se ajo ishte informuar nga Autoriteti për Informimin mbi Dokumentet e Ish-Sigurimit të Shtetit se anëtari i KLP-së Bujar Sheshi, figuronte si bashkëpunëtor i Sigurimit të Shtetit.
KLP-ja është përgjigjur duke sqaruar se nuk ka tagrin ta hetojë Markun.
Ndërsa opozita thotë se Arta Marku ka shkelur ligjin për mos verifikimin e plotësimit të kushteve nga kandidati Sheshi, KLP sqaron se nuk mund të nisë hetim ndaj saj, pasi një gjë e tillë i takon Inspektorit të Lartë të Drejtësisë.
Në kushtet kur ky institucion nuk është krijuar, KLP thotë se duhet t’i drejtohen Kolegjit të Apelimit.
