Kryeministri Rama i shoqëruar nga dy ministrat, Gjiknuri dhe Ahmetaj pati një dëgjesë me Sindikatën e Minatorëve që sot janë në pension. Temë e bisedës ka qenë Statusi i Minatorit, por në takim, kryeministri preku edhe humbjet e jetës së minatorëve.
“Në raport me jetën dhe çfarë ndodh pas, me familjet e atyre që humbin jetën. Kemi pasur një rënie drastike të atyre që humbin jetën. Rruga nuk është buxheti, por sigurimi I jetës. E kemi në plan t’u imponojmë kompanive sigurimin e jetës të punëtorëve.
Në rast se një minator humb jetën, të jetë i siguruar për një periudhë të caktuar” u shpreh Rama.
Kryeministri flet për uljen drastike të numrit të të vdekurve, por vetëm javën që kaloi vdiqën dy minatorë.
Rasti i parë ndodhi të premten në një galeri kromi pranë qytezës së Klosit. Aty mbeti i vrarë një minator 57 vjeçar, të cilit policia iu referua me inicialet P.M.
Rasti i dytë ndodhi të shtunën pasdite. Minatori tjetër që mbeti i vrarë ishte Angjelosh Shahini, 37 vjeç.
6 minatorë kanë humbur jetën në zonën e minerave të kromit në Klos dhe Bulqizë. Të dhënat e fundit tregojnë se vlera e kromit të nxjerrë në Bulqizë dhe të eksportuar, arrin në rreth 100 milionë euro në vit.
