"Çunat" e Saimir Tahirit janë vënë sërish në shenjestër. Kritikat janë thuajse të njëjtat me ato të viteve të shkuara; policë që nuk respektojnë uniformën, që rrinë kot nëpër kryqëzime, më shumë për ndonjë gjobë sesa për të bërë punën. Kur polici thuhet se ka kaluar në epokën dixhitale, policët i kanë sjelljet e njëjta. Gazetari Sokol Shameti ka dashur ta ndajë me ndjekësit e tij këtë foto, duke bërë edhe komentin e mëposhtëm.
"Nuk besoj se këta të dy janë policë "bravoçuna".
Së pari: Sepse bravoçunat tanë nuk dalin më nëpër kryqëzime në pritje të gjahut. Kjo formë primitive, rudimentare prej prostitucioni policor ka marrë fund me kohë në Shqipëri sepse ishte skandal i vërtetë që nuk ta zinin sytë askund në Evropë.
Së dyti: Semafori ku kanë dalë këta, është funksional. Ai punon. Paratē e taksave tona janë shpenzuar mirë në këtë rast dhe trafiku i automjeteve rregullohet në mënyrë elektronike - pa pasur nevojë të shpenzohen para shtesë për të paguar rroga "bravoçunash" që dublojnë semaforin dhe bëjnë të njëjtën punë si ai. Në Shqipëri kryqëzimet i kemi me semaforë. Kemi paguar për ta. Nëse s'ka semafor - siç ta do logjika - atëherë ka polic. Pra në këtë rast, punë e bërë dy herë, punë e paguar dyfish, para e shpërdoruar - nuk e bën policia jonë këtë.
Së treti: Pantallonat e gjera të uniformës së njërit prej "bravoçunave", nxjerrin zbuluar tegelin ngushtues model "tub" të bravoçunit tjetër. Policët tanë e nderojnë uniformën, nuk e ujdisin atë sipas modës, se ndryshe ç'uniformë do quhej ajo?
Prandaj them se nuk janë policë këta. Duke gjykuar nga rraketat që mbajnë në duar, besoj se janë ekipi kombëtar i pingpongut në një moment pushimi."
