Video që Kryeministri shqiptar publikoi një ditë më parë në profilet e tij të rrjeteve sociale, duket se nuk i ka pëlqyer shkrimtares së njohur, e cila ka ndarë me miqtë në facebook një reagim kritik, kundër Edi Ramës. Elvira Dones ironizon postimin e Ramës, ku bashkëngjitur videos që këngëtarja e njohur amerikane Anstacia i dedikoi shqipërisë, Kryeministri shkroi, “Në betejën kundër çdo forme diskriminimi”. Ky titull duket se ka ngjallur pakënaqësinë e znj. Dones, për të cilën, në kontrast me videon, nuk duket i qëlluar. “Në betejën kundër çdo forme diskriminimi”, qëllim i bukur në titull, diçka angazhuese dhe e dobishme. Sikur të mos u servirej grave të Shqipërisë dhe Kosovës përmes një përshëndetje/videoje qesharake të Anastacia Lynn Newkirk, e cila do ardhkërka nga këto anë për të ndriçuar e motivuar në betejën kundër çdo forme diskriminimi.” – shkruan Elvira Dones.
Më tej, shkrimtarja kapet dhe gjykon një këngëtare për ato 13 sekonda që shfqet në video: “Përshendet, Anastacia, duke thënë Mirupafshim në TERRANA, dhe pastaj, me një gjest gishtash prej adoleshenti lëshon ca tinguj që do bënin të qeshnin, apo qanin, edhe gurët e rrugëve.”
Megjithatë, Elvira Dones, nisur nga shija personale, ka sugjerimin e saj për aritstët që vërtetë janë të aftë të përfaqësojnë këtë kauzë: “Duke mos dashur të ul vlerat e këngëtares në fjalë. Në lëmin e saj ka publikun që i përket, ka shitur disqe (përsëri, në llojin e muzikës që bën), dhe shumë mirë për të.
Por për organizuesit e këtyre nismave nga këto anë marr mundimin të them se betejat kundër formave të diskriminimit nuk janë palaçollëqe, por një punë serioze;
se për të tilla nisma gratë shqiptare kanë nevojë të shohin në skenë artiste të angazhuara, të cilat me muzikën, mendjen e angazhimin e tyre janë realisht burim frymëzimi. Artiste që bashkojnë gjuhë, ide, tinguj, kultura.
Quhen, për shembull, Fiorella Mannoia, Noah, Tracy Chapman, Angélique Kidjo, Marta Gomez, Shadia Mansour, Koncha Buika...
Kaq kisha.” – përfundon reagimin shkrimtarja.
