Detaje të reja janë bërë publike për momentet e fundit të jetës së aktores së njohur Hayden Panettiere, e cila u nda nga jeta në moshën 36-vjeçare.
Panettiere u gjet pa ndjenja në një banesë në Greenville, Karolina e Jugut, rreth orës 13:51 të së dielës, më 16 gusht. Në vendngjarje mbërritën policia dhe ekipet e urgjencës, të cilat e gjetën aktoren në arrest kardiak.
Sipas të dhënave të reja të bëra publike nga audioja e komunikimeve të emergjencës, në momentet kur autoritetet po i përgjigjeshin telefonatës së urgjencës u përmendën “mbidoza” dhe “arresti kardiak”.
Megjithatë, autoritetet nuk kanë konfirmuar se mbidoza ishte shkaku i vdekjes.
Zyra e Mjekut Ligjor të Greenville njoftoi se ekipet mjekësore tentuan ta rikthenin në jetë Panettiere, por përpjekjet dështuan. Aktorja u shpall e vdekur në orën 14:32.
Në një deklaratë zyrtare u bë e ditur se Panettiere ishte gjetur pa ndjenja brenda banesës ku po qëndronte përkohësisht. Autoritetet theksuan gjithashtu se nuk janë konstatuar shenja traume që mund të kishin kontribuar në vdekjen e saj.
Autopsia u krye të hënën, por shkaku dhe mënyra e vdekjes mbeten ende të papërcaktuara, ndërsa priten rezultatet e analizave të mëtejshme.
Ndërkohë, sipas një burimi, në vendngjarje u gjet edhe Narcan, një medikament që përdoret për të neutralizuar me shpejtësi efektet e një mbidoze të rrezikshme nga opioidet.”
Policia e Greenville ka bërë të ditur se hetimi vijon dhe se deri tani nuk ka pasur shenja të ndonjë akti kriminal apo rrethanash të dyshimta. Telefonata në numrin e emergjencës 911 u bë nga një person i njohur i aktores.
Hayden Panettiere ishte e njohur për rolet e saj në serialet “Heroes” dhe “Nashville”, si dhe në filmat e serisë “Scream”. Aktorja la pas vajzën e saj 11-vjeçare, Kaya, të cilën e kishte me ish-të fejuarin e saj, boksierin ukrainas Wladimir Klitschko.
