Janë publikuar pamje të reja nga zjarri që përfshiu në orët e para të mëngjesit të së dielës hotelin “Brooklyn” në Lungomare të Vlorës.
Në pamjet e publikuara shihet momenti kur flakët kanë përfshirë pjesën e poshtme të objektit, ndërsa tymi ka mbuluar katet e sipërme.
Në rrugë shihen njerëz që janë larguar nga hoteli, ndërsa disa prej pushuesve janë detyruar të dalin nga ballkonet për t’i shpëtuar zjarrit.
Ngjarja ndodhi rreth orës 04:05. Sipas Policisë së Vlorës, 6 pushues janë lënduar, 5 prej tyre shtetas të Kosovës dhe një nga Rrësheni.
Pesë të lënduar janë dërguar për trajtim të specializuar në Tiranë, ndërsa njëtjetër po trajtohet në Spitalin Rajonal të Vlorës. Dy prej të lënduarve kanë pësuar djegie të konsiderueshme trupore.
Një pushues nga Kosova ka rrëfyer se, pasi kishte parë tymin dhe flakët ishte detyruar të hidhej nga ballkoni për të shpëtuar.
Sipas hetimeve paraprake të Policisë, zjarri dyshohet se ishte aksidental dhe ishte shkaktuar nga djegia e prizës elektrike të një frigoriferi në ambientet e restorantit. /LAPSI.al
