Gigi Hadid ka zbuluar një nga mënyrat e veçanta me të cilat përkëdhel partnerin e saj, Bradley Cooper, dhe bëhet fjalë për një pjatë të thjeshtë makaronash.
Modelja 31-vjeçare përgatiti një recetë me proshutë italiane dhe erëza gjatë serisë “Now Serving” të “Vogue France”, në një video të publikuar të mërkurën.
Teksa shtonte në tigan domate, proshutë, koriandër, vaj ulliri, stika pishe, parmixhano dhe spec të kuq për pak shije pikante, Hadid tregoi se këtë pjatë ia ka përgatitur shpesh partnerit të saj.
“Patjetër që ia kam bërë këtë burrit tim”, tha ajo, pa e përmendur Cooper me emër.
“Ai e adhuron këtë”, shtoi modelja, duke zbuluar se receta duket se është një prej të preferuarave të aktorit.
Hadid tregoi gjithashtu se nuk është nga ato persona që ndjekin me përpikëri sasitë e përbërësve kur gatuan.
“Gjithçka ka të bëjë me shijimin, nuhatjen dhe ta ndjesh vetë se çfarë i duhet. Gatimi është thjesht një formë tjetër e të qenit krijues”, u shpreh ajo.
Në një intervistë për “Vogue France”, të publikuar një ditë më herët, Hadid foli edhe për marrëdhënien e saj me Cooper, duke e cilësuar atë si shumë të ndryshme nga lidhjet që ka pasur më parë.
“Ajo që është e bukur në marrëdhënien time aktuale dhe shumë ndryshe nga ajo që kam përjetuar më parë është aftësia për të qenë thellësisht të sinqertë. Të themi atë që mendojmë, në momentin që e mendojmë”, tha ajo.
Modelja pranoi se ajo dhe aktori kanë karriera të ndryshme dhe nuk mund t’i kuptojnë gjithmonë plotësisht sfidat profesionale të njëri-tjetrit.
“E rëndësishme është të kesh dikë që të mbështet dhe të ndihmon të qëndrosh me këmbë në tokë”, shtoi Hadid.
Çifti u lidh për herë të parë në mënyrë romantike në tetor 2023, kur u panë duke darkuar së bashku në New York.
Që prej atëherë, Hadid dhe Cooper janë fotografuar vazhdimisht bashkë dhe lidhja e tyre është kthyer në një prej romancave më të komentuara të Hollywood-it.
Së fundmi, dyshja ka nxitur edhe thashethemet për martesë, pasi u fotografuan me unaza që ngjanin me unaza martese. Më herët, kishte pasur gjithashtu raportime se Cooper po mendonte për martesë dhe fëmijë me modelen.
Hadid është nënë e vajzës 5-vjeçare Khai, të cilën e ka me ish-partnerin Zayn Malik. Ndërsa Cooper ka një vajzë, Lea, 9 vjeç, nga lidhja e tij e mëparshme me Irina Shayk.
