Aktorja e njohur Busy Philipps ka zbuluar se është diagnostikuar me një tumor të rrallë malinj në tru dhe se ka kaluar dy ndërhyrje kirurgjikale gjatë asaj që e përshkroi si “gjashtë muajt më të çuditshëm të jetës së saj”.
47-vjeçarja, e njohur për rolet e saj në “Dawson’s Creek” dhe “Freaks and Geeks”, rrëfeu për revistën People se ndihet jashtëzakonisht mirënjohëse që është gjallë. “Jam mirënjohëse që jam gjallë”, tha ajo, duke e cilësuar veten “vajza më me fat në botë”.
Tumori, një oligodendrogliomë e shkallës së dytë, u zbulua më 12 shkurt gjatë një rezonance magnetike të të gjithë trupit. Vetëm një ditë më parë, aktori dhe bashkëprotagonisti i saj në “Dawson’s Creek”, James Van Der Beek, kishte ndërruar jetë nga kanceri.
Philipps tregoi se fillimisht kishte menduar ta anulonte ekzaminimin. Në vitin 2025, mjeku i saj i familjes e kishte këshilluar të mos e bënte skanimin, por një bisedë me një të afërm, Dr. Justin Donlan, e kishte bindur. “Dituria është fuqi”, i kishte thënë ai, një shprehje që aktorja thotë se “rezonoi shumë” me të.
Edhe pse takimi i saj ishte shtyrë nga janari në shkurt, Philipps po mendonte sërish ta anulonte. Ish-bashkëshorti i saj, Marc Silverstein, e bindi të mos e bënte.
Kur mjekët zbuluan një lezion në tru, aktorja i dërgoi Silverstein një mesazh ku i shkruante: “OMG, kam tumor në tru”. Në atë moment, ajo ende shpresonte se bëhej fjalë për diçka beninje.
Pas një tjetër rezonance, neurologu i tha se masa ishte një tumor i vërtetë dhe se duhej hequr.
Lajmi e la Philipps në panik. Ajo tregoi se mezi po merrte frymë”, ndërsa duhej t’ua tregonte edhe dy fëmijëve të saj, Birdie, 18 vjeç, dhe Cricket, 13 vjeç.
Masa, me përmasa 2.6 centimetra, u hoq gjatë një operacioni pesëorësh më 2 mars.
Neuro-onkologu i saj, Dr. John Golfinos, shpjegoi se zbulimi i hershëm ishte shumë i rëndësishëm. Sipas tij, nëse tumori do të ishte zbuluar më vonë, ai mund të kishte qenë dy ose tre herë më i madh dhe shumë më i vështirë për t’u hequr plotësisht.
Megjithëse oligodendroglioma konsiderohet malinje, mjeku sqaroi se ka prognozën më të mirë mes gliomave malinje. Tumori klasifikohet si kancerogjen për shkak të mundësisë që të rritet sërish me kalimin e kohës.
Por një muaj pas operacionit, aktorja u përball me një tjetër komplikacion. Gjatë një seance Botox-i, dermatologu i saj vuri re se vendi i prerjes nuk po shërohej siç duhej. Philipps kishte zhvilluar një infeksion stafilokoksik dhe iu desh t’i nënshtrohej një operacioni të dytë.
“Thjesht ndjeva sikur isha kthyer në pikën zero. Isha vërtet shumë e mërzitur”, rrëfeu ajo.
Sot, aktorja thotë se ndihet ndryshe dhe nuk ka më ndjesinë se “truri i saj është i prishur”, siç i kishte thënë më parë mikeshës së saj të ngushtë, Michelle Williams.
Philipps tha se prej vitesh e ndiente se “diçka nuk po funksiononte siç duhej”, edhe pse nuk ishte e vetëdijshme se kishte një problem serioz.
“Shpesh mjekët na thonë se nuk ka asgjë për t’u shqetësuar, ndërsa ti e di se diçka nuk shkon”, tha ajo, duke shtuar se për të informacioni nuk është diçka nga e cila duhet të kesh frikë, por një burim fuqie.
