RTSH po zien! Në industrinë e medias shqiptare ka nisur një nga lëvizjet më interesante të merkatos televizive, ndërsa Radio Televizioni Shqiptar po bën lëvizjet e tij strategjike për sezonin e ri.
Nuk bëhet fjalë vetëm për personazhe televizive. Merkatoja ka prekur edhe autorë, gazetarë, producentë dhe profesionistë të tjerë të fushës, duke sinjalizuar një sezon të ri me shumë ndryshime, emra të rinj dhe pozicionime të reja.
Në korridoret e RTSH-së, në studiot televizive dhe në zyrat e institucionit, emrat që përfliten janë të shumtë. Eva Murati, Arvin Kita, Klotilda Harka, Matilda Terpollari, Elona Jacellari, Bojken Lako, Gjergj Kacinari, Alba Çobaj e të tjerë janë ndër emrat që lidhen me lëvizjet e reja të institucionit.
Por surprizat më të mëdha duket se rezervohen për prime time.
RTSH pritet të rikthejë në ekranin e mbrëmjes spektakle të mëdha muzikore dhe artistike, të udhëhequra nga dy emra të njohur të muzikës shqiptare, maestro Alfred Kaçinari dhe maestro Shpëtim Saraçi. Një rikthim i fortë i muzikës live, orkestrës dhe spektaklit televiziv që synon t’i japë prime time-it të RTSH-së një tjetër dimension.
Por surprizat nuk mbarojnë këtu.
Disa prej emrave që tashmë janë pjesë e RTSH-së pritet të rikthehen në ekran me pozicione dhe projekte të reja. Mes tyre përfliten Anjola Hamzaj, e cila pritet të vijë me një tjetër program, si edhe Krist Martiro dhe Sonila Agostini, që thuhet se do të kenë role të reja në sezonin që po vjen.
A është kjo vetëm një pjesë e merkatos? Apo RTSH po përgatit një riformatim shumë më të madh të ekranit?
Një gjë duket e sigurt: sezoni i ri televiziv në RTSH nuk do të jetë aspak i qetë. Lëvizjet kanë nisur, emrat po qarkullojnë dhe prime time po përgatit surprizat e tij.
Merkatoja televizive është ndezur. Dhe duket se kjo është vetëm lista e parë…
