Kryeministri Edi Rama ka folur edhe për ish-presidentin Ilir Meta gjatë podkastit "Flasim" përballë Rudina Xhungës.
Rama thotë se pushteti është kafshë e përbindshme dhe se Meta nuk e mbajti dot peshën e pushtetit ndaj dhe u katandis në një personazh qesharak.
Sa për mbajtjen në qeli të kryetarit të Partisë së Lirisë, Kryeministri thotë se paraburgimi i gjatë është i pajustifikuar.
“Për Ilir Metën ndiej keqardhje. Ishte një talent që nuk e mbajti dot peshën. Pushteti është kafshë e përbindshme, është zor ta mbash. Ka ngrënë e ka futur ndër vete shumë burra. Nuk e mbajti dot peshën e pushtetit dhe përfundoi si përfundoi, u katandis në një personazh qesharak.
Sa i përket paraburgimit, nuk është sekret që unë kam rezerva shumë serioze për praktikën e paraburgimit. Jemi një vend në rekord të zi dhe asnjë paraburgim, përjashto ato të krimit të organizuar që mirë bëjnë, nuk shoh asnjë paraburgim të gjatë të justifikuar”, - tha Rama. /LAPSI.al
