
“Tani më lini të luaj poker në paqe”. Me këtë fjali, Neymar e përfundoi mesazhin në të cilin mohoi se është në një lidhje me Virginia Fonseca, ish-partneren e Vinicius Júnior. Sulmuesi i Santos publikoi mohimin në historitë e tij në Instagram, pasi thashethemet u përhapën në Brazil. “Zakonisht nuk merrem me këtë lloj gjëje përmes stories, por këtë herë e kanë tepruar”, shkroi ai në rrjetet sociale.
Thashethemi lindi nga një raportim i Fábia Oliveira në Metrópoles. Gazetarja tha se Neymar dhe Virginia kishin qenë të dy në një festë private në São Paulo më 6 nëntor dhe se influencuesja kishte kërcyer pranë futbollistit, ndërsa ai ishte ulur në një divan. Sipas A Bola, përfaqësuesit e të dyve mohuan se kishte një lidhje mes tyre. Rrethi i Neymar këmbënguli se “informacioni i publikuar është i rremë dhe nuk përputhet me realitetin e fakteve”. Ekipi i Virginia i cilësoi raportimet për një lidhje të pretenduar si “plotësisht të rreme” dhe kritikoi spekulimet për jetën e saj private, të paraqitura si fakte.

Neymar përgjigjet në vetën e parë
Disa orë pas mohimeve, lojtari i Santos reagoi personalisht. “Po qarkullon një histori që pretendon se ekziston një lidhje mes një personi tjetër dhe meje, dhe unë e mohoj këtë!”, shkroi ai në Instagram. “Ekipi im ka publikuar tashmë një deklaratë, por më duhej të ndërhyja personalisht për t’i dhënë fund kësaj çështjeje!”
Virginia Fonseca dhe Vinicius Júnior kishin rifilluar lidhjen e tyre në korrik, dy muaj pas ndarjes së parë. Kur konfirmoi ndarjen e fundit, ekipi i influencueses deklaroi se bëhej fjalë për një vendim të përbashkët.