Christa Pike, e dënuara me vdekje në Tenesi të SHBA-ve është në "gjendje kritike duke marrë kujdes për shpëtimin e jetës" në spital, pasi u mbijetoi dy herë injeksioneve vdekjeprurës. Kjo bëri që guvernatori i shtetit të ndalojë të gjitha ekzekutimet për këtë vit.
“Nuk kemi ndonjë ide për gjendjen e saj apo shumë përditësime mbi shëndetin e saj për momentin" - u tha avokati i saj Randy Spivey gazetarëve të enjten. "Por ne e dimë që ajo është gjallë tani."
Avokatët e saj tani po kërkojnë që dënimi i saj të ndryshohet. Pike, 50 vjeçe, u dënua me vdekje në vitin 1996 për vrasjen e shoqes së saj të klasës Colleen Slemmer.
Asaj iu injektuan dy doza vdekjeprurëse pentobarbital të mërkurën, por mbeti gjallë, thanë avokatët e saj. Ajo u dërgua më pas në spital me një ambulancë. Pike ishte 18 vjeç kur ajo dhe i dashuri i saj i atëhershëm, Tadaryl Shipp, rrahën, torturuan dhe vranë 19-vjeçaren Slemmer.
Ekzekutimi i saj ishte objekt i një beteje ligjore të minutës së fundit. Kjo kulmoi me Gjykatën Supreme të SHBA-së që lejoi kryerjen e injeksioneve vdekjeprurëse. Nëna e Slemmer, May Martinez, e cila ishte midis atyre që donin që ekzekutimi të kryhej dhe që udhëtoi për në Tennessee për ta dëshmuar atë, i tha NBC News pas përpjekjes së dështuar se "ishte një rrëmujë".
Të enjten pasdite, avokatët e Pike dhanë më shumë detaje rreth asaj që ndodhi gjatë tentativës së ekzekutimit, duke përshkruar një skenë të tmerrshme të mbuluar nga sekreti.
Avokati tha se dëshmitarët u mbajtën në një dhomë të errët pas një perdeje të mbyllur, pasi ishte administruar doza e dytë vdekjeprurëse, por "ishte e qartë se zonjusha Pike po merrte frymë ende" edhe disa minuta më vonë. "Askush nuk e dinte se çfarë po ndodhte pas asaj perdeje," tha Spivey. "Nuk kisha asnjë ide se kur dhe nëse profesionistët mjekësorë filluan të ndihmonin."
Spivey tha se guvernatori i shtetit duhet tani ta ndryshojë dënimin e Christës, një kërkesë që ishte refuzuar më parë. Stephen Ferrell, një tjetër avokat i Pike, tha se po shqyrtonin edhe mundësi të tjera ligjore. Guvernatori i Tenesit, Bill Lee, ka urdhëruar një hetim të pavarur.
Kjo është hera e dytë në vitin 2026 që zyrtarët e Tenesit u përpoqën dhe dështuan të ekzekutonin një të burgosur. Në maj, ekzekutimi i Tony Carruthers u anulua pasi stafi nuk arriti t’i gjente një venë për të administruar një ilaç vdekjeprurës. Carruthers iu dha një vit shtyrje e dënimit.
Ndërsa Presidenti Trump e quajti ekzekutimin e dështuar të Christa Pike një "situatë interesante", por refuzoi të jepte mendimin e tij për hapat e mëtejshëm, duke thënë se kjo varet nga shteti i Tenesit. ©LAPSI.al
