Katër shqiptarë, të moshave 24 deri në 38 vjeç, janë arrestuar në Itali, pasi dyshohen se janë pjesë e një grupi kriminal të përfshirë në dhjetëra vjedhje banesash. Operacioni u zhvillua nga karabinierët e Solofras, në provincën e Avellinos, pas hetimeve të koordinuara nga Prokuroria lokale.
Sipas raportimeve nga mediat e huaja, grupi dyshohet se ka vepruar në disa rajone, përfshirë Campania, Lazio dhe Molise, ndërsa hetuesit kanë lidhur me të të paktën 40 raste grabitjesh në banesa.
Të arrestuarit, banues në provincat e Napolit dhe Casertas, akuzohen për organizim kriminal me qëllim kryerjen e vjedhjeve. Hetimet vijojnë për të zbardhur të gjitha rastet dhe për të përcaktuar nëse në aktivitetin e dyshuar kriminal janë përfshirë edhe persona të tjerë.
