Gjykata e Lartë ka prishur vendimin e Gjykatës së Apelit të Juridiksionit të Përgjithshëm për çështjen e Ergys Kolaverit, duke e kthyer dosjen për rigjykim në Apel, me një tjetër trupë gjykuese.
Vendimi është marrë nga trupi gjykues i kryesuar nga gjyqtari Sandër Simoni, i cili ka vendosur prishjen e vendimit të Apelit që e kishte shpallur Kolaverin të pafajshëm.
Ergys Kolaveri ishte dënuar në shkallën e parë me 20 vite burg për atentatin e dështuar me snajper ndaj Gazmir Dacit, me qëllim vrasjen e tij brenda burgut të Vaqarrit.
Por, në vitin 2022, Gjykata e Apelit i dha atij lirinë, ndërsa ndodhej nën arrest shtëpiak prej vitit 2020.
Kolaveri ishte në gjykim për vrasje të mbetur në tentativë dhe u dënua në nëntor të vitit 2017, me 20 vite burg nga Gjykata e Krimeve të Rënda. Pikërisht ky vendim i dhënë nga kjo gjykatë u bë shkak për një sërë procesesh gjyqësore deri në Gjykatën e Lartë, çka solli lirimin nga qelitë të Kolaverit në janar të vitit 2020.
Sipas dosjes së Prokurorisë, thuhet se pasditen e 30 korrikut të 2016, i pandehuri organizoi një atentat ndaj Gazmir Dacit, i cili ndodhej në Burgun e Vaqarit në pritje të gjykimit për vrasjen e Gazmir Kolaverit dhe plagosjen rëndë të Robert Kolaverit.
Prokuroria theksoi se Kolaveri i pajisur me një armë të sofistikuar snajper ishte vendosur në një distancë të largët në ambientet e jashtme të burgut dhe priti derisa Gazmir Daci doli në ajrim. Plani për të marrë gjakun vëllait, nuk shkoi si duhet, pasi nuk mundi ta vrasë atë që e konsideronte si hasmin e tij, por la të plagosur një të paraburgosur, shtetas i Kosovës. Më pas, sipas Prokurorisë, atentatori ndonëse kishte dështuar, u largua me shpejtësi me një makinë.
