Një 30-vjeçar ka rënë në prangat e policisë së Tiranës i dyshuar për tre vjedhje në dyqane të ndryshme me anë të kërcënimit me thikë të shitëseve.
Policia njofton se Igli Bylykbashi ka kërcënuar me mjet prerës (thikë) punonjëset, duke vjedhur xhirot ditore në 3 subjekte (2 njësi të një kompanie telefonike dhe 1 dyqan), ndërsa u kap pak orë pas kryerjes së vjedhjes së tretë në mbrëmjen e së enjtes.
“Menjëherë pas kallëzimit të punonjëses në një njësi të një kompanie telefonike, në Rrugën e Dibrës, se mbrëmë një shtetas kishte vjedhur xhiron ditore pasi e kishte kërcënuar me mjet prerës (thikë), shërbimet e Komisariatit të Policisë Nr. 4 organizuan opercionin “Metoda”, ku u kap pak orë pas kryerjes së këtij krimi autori i dyshuar, shtetasi I. B., 30 vjeç, banues në Tiranë”, njofton Policia e Tiranës.
Ndërsa janë sekuestruar shuma e parave të vjedhura, mjeti prerës dhe celulari i të arrestuarit, nga verifikimet e mëtejshme dyshohet se ky shtetas, me të njëjtën metodë, kishte vjedhur xhirot ditore në 2 subjekte gjatë muajit dhjetor 2025.
Punohet për zbardhjen e vjedhjeve të tjera që mund të ketë kryer ky shtetas, ndërsa materialet procedurale iu referuan Prokurorisë së Tiranës për veprime të mëtejshme.
