Filmi më i ri i Brad Pitt, “F1” është zyrtarisht premiera më e suksesshme në karrierën e aktorit.
Sipas agjencisë Associated Press, “F1” arkëtoi 55.6 milionë dollarë në Amerikën e Veriut gjatë fundjavës së parë dhe 144 milionë dollarë në mbarë botën, duke u bërë filmi me hapjen më të madhe ndonjëherë për Apple.
Sipas drejtuesit të shpërndarjes në Warner Bros., Jeffrey Goldstein, Pitt ishte “përbërësi sekret” i suksesit të filmit.
“Ne prisnim që filmi të performonte mirë ndërkombëtarisht për shkak të popullaritetit të Formula 1,” – tha ai, “por Pitt ishte thelbësor.”
Apple dhe Warner Bros. bashkëpunuan për shpërndarjen e filmit, dhe zyrtarë të kompanisë e përshkruan premierën si të “jashtëzakonshme”.
“Debutimi i fuqishëm i filmit pasqyron entuziazmin për Formula 1 dhe historinë emocionuese që solli ekipi krijues,” – tha Zack Van Amburg, shefi i videove në Apple.
Në film, Brad Pitt luan rolin e Sonny Hayes, një ish-pilot i Formula 1 që kthehet në pistë për të ndihmuar një skuadër të dobët, APXGP, të ngjitet për herë të parë në podium.
Ai bashkohet me mikun e tij të vjetër, Ruben Cervantes (luajtur nga Javier Bardem) dhe përballet me sfida, përfshirë një pilot të ri arrogant, Joshua Pearce (Damson Idris).
Producenti Jerry Bruckheimer zbuloi se Pitt ishte i apasionuar pas makinës:
“Nuk priste dot të futej në makinë. Kur xhirimet përfunduan pas dy vitesh, e kishim të vështirë ta nxirrnim nga makina.”
“Dita më e trishtuar për Brad ishte kur i thamë ‘mbaruam’ dhe ai duhej të dilte nga makina. E dashuroi çdo sekondë të xhirimeve.”
