Vendin në titullar e ka fituar, edhe pse te Torino nuk po luan, duke mundur konkurencën e Strakoshës e Selmanit, e konfirmuar kjo nga prezenca në konferencën zyrtare për shtyp në krah të teknikut Edoardo Reja, por tani Etrit Berisha duhet të fitojë një tjetër sfidë: atë përballë sulmuesit polak Robert Lewandowski: “Polonia ka shumë lojtarë cilësorë dhe yje botërorë si Levandovski, mirëpo ne jemi mësuar që çdo javë të kemi lojtarë të rrezikshëm dhe shpresoj se nesër si skuadër të bëjmë diferencën dhe t’i ndalojmë sulmet e tyre. Gjëja e parë është që ndeshja të përgatitet në mënyrën më të mirë dhe ato gjëra që i thotë trajneri t’i bëjmë edhe në fushë, - tha portieri kuqezi nw konferencw -. Po i bëjmë edhe gjërat e fundit taktike dhe që nesër të jemi gati për të zhvilluar një ndeshje, që për ne do të thotë shumë nëse marrim një rezultat pozitiv".
Formula se si mundet Polonia mund të jetë e nxituar për tu reklamuar, sepse ndeshja ka gjithnjë të papritura që nuk mund të parashikohen e megjithatë një ide si mund të vihen në vështirësi kundërshtarët Berisha e ka: "Do mundohemi t’i shfrytëzojmë edhe gabimet e ekipit kundërshtar. Për ne, Polonia mbetet gjithmonë një ekip i fortë. Dimë që në shtëpi Polonia nuk ka humbur për një kohë të gjatë. Di të them që çdo ditë është një ditë e re dhe mundësitë gjithmonë janë të reja. Kemi mundësi ta surprizojmë Poloninë, vetëm duhet të kemi vetëbesim së pari dhe pastaj gjërat e tjera t’i bëjmë me përpikmëri. Besoj se raste do kemi dhe shpresoj shumë të bëjmë një rezultat pozitiv" përfundoi kapiteni i kombëtares.
https://youtu.be/LdwxyPXxqxM
