Kryebashkiaku i Tiranës, Erion Veliaj ka deklaruar se PS ka fituar njësinë 2 në Tiranë. Në këtë komunikim nuk ka munguar as falenderimet për çdo socialist, nisur nga numëruesit, komisionerët, por dhe patronazhistët. Këta të fundit janë përmendur si ndër kontribuesit kryesor të fitores gjatë shumë njoftimeve të figurave kryesore të Partisë Socialiste: qoftë nga kryeministri Rama, qoftë nga kryebashkiaku Veliaj. Kreu i bashkisë Tiranë tha se dy kandidatët për këtë zonë nga opozita dhe maxhoranca duhet të punojnë bashkë për të mirën e komunitetit.
"Nuk ka rëndësi nëse jeni nga Sauku apo nga rruga e Elbasanit. Faleminderit të gjithë qytetarëve. Ka qenë një ditë natë 72 orëshe. Falenderoj të gjithë komisionerët, numëruesit, patronazhistët e të gjithë bashkë. Nga sot fillojmë punën. Sot i shtrijmë dorën kundërshtarëve tanë. Fushata mbaroi dhe çdo lloj qejfmbejtje duhet të jetë pjesë e të kaluarës. I kam kërkuar Benit të telefonojë Joridën . Duhet që të punojnë bashkë për të mirën e njësisë. Unë besoj fort që skuadra jonë e ka dinjitetin të shtrijë dorën e bashkëpunimit që njësia dy të ecë akoma më përpara”, deklaroi Veliaj.
