Presidenti i Republikës, Ilir Meta ka kthyer një tjetër ligj në Kuvend. Kreu i shtetit ka kthyer për rishqyrtim ligjin mbi sigurimin e detyrueshëm në sektorin e transportit duke dhënë edhe arsyet e këtij dekreti. Ndër të tjera, Meta thekson se ky draft nuk garanton cilësisht mbrojtjen e jetës së qytetarëve. Sipas presidentit, neni 8 i këtij ligji nuk i jep zgjidhje përfundimtare problematikave të konstatuara, dhe as përmbush objektivin e vet ligjvënësit përkundrejt impelemenimit të sistemit bonus-malus në sigurimin e detyrueshëm.
Sipas Metës, Kuvendi i Shqipërisë ka treguar për të disatën herë se nuk është për të përmbushur kërkesat e shoqërisë shqiptare, duke lënë sërish shtigje të hapura, dhe kleçka ligjore që tregu i sigurimeve të mos rregullohet sipas orientimit dhe forcës shtrënguese të ligjit, standarteve ndërkombëtare, por sipas dëshirës apo dakordësisë të kompanive të sigurimit.
