Kreu i Partisë Demokratike, Lulzim Basha, në një intervistë për "News 24", iu përgjigj akuzave të PS mbi kandidatët e PD, përkatësisht kandidatit në Shijak, si i lidhur me krimin. Nga Berati, lideri demokrat tha se PD-ja është hartuesja e ligjit të dekriminalizimit, ndaj sipas tij, është hipokrizi moralizimi që bëhet nga një forcë politike dhe nga një njeri që kriminalizoi forcën e tij politik. Gjithashtu, Basha theksoi se vetëm në Durrës tre kandidatë të Partisë Socialiste janë përfaqësues të bandave të Durrësit.
“Duhet të jemi fare të qartë, Partia Demokratike është hartuesja e ligjit për dekriminalizimin. Unë personalisht kam zhvendosur nga listat tona persona për shkak të indicieve në të kaluarën dhe do ta bëj këtë sa herë që të jetë e nevojshme dhe kjo është arsyeja se pse rast pas rasti kam kërkuar unë vetë verifikim nga autoritetet. Pra, është hipokrizi e madhe të presësh moralizim nga një forcë politike dhe nga një njeri që kriminalizoi forcën e tij politike. Sot, problemi i Shqipërisë dhe i shqiptarëve është kriminalizimi që Edi Rama i ka bërë pushtetit dhe forcës së tij politike. Fakti që poshtë një boje të hollë emrash kryesisht anonim vazhdojmë të kemi persona me rekorde kriminale, aleatë dhe anëtarë të listës së Partisë Socialiste. Në Durrës, vetëm në Durrës, janë tre emra përfaqësues të bandave të Durrësit. Në Elbasan po kështu e kudo ju e patë në ditën e verës që jua prishi festën qytetarëve të Elbasanit ”, tha Basha.
Ndërkaq, Basha deklaroi se problemi i Shqipërisë dhe i shqiptarëve është kriminalizimi, ndërsa u zotua se pas 25 prillit, nëse ai vjen në pushtet, do të bëjë vettingun e politikanëve.
