Qytetarët e dëmtuar prej tërmetit të 26 nëntorit të vitit që shkoi duket se kanë ende paqartësi në lidhje me dëmshpërblimin që do t’u jepet. Këtë shqetësim e ndjejnë edhe banorët e pallatit 783 të lagjes 5 në Durrës, ku banojnë 40 familje. Ata po protestojnë për shkak se nuk e dinë ende nëse pallati i tyre do të shembet apo rikonstruktohet. Deri më tani kanë marrë bonusin e qirasë, ndërsa pallati është i dëmtuar nga tërmeti në shkallën Ds4.
Banorët shprehen se ka patur dëmtime të rënda në pallat, por ata pretendojnë se nuk është duke shkuar askush nga Instituti i Ndërtimit për të bërë një analizë të thelluar.
Përgjigjja që kanë marrë prej Institutit të Ndërtimit është se informacioni në lidhje me vendimin e marrë për godinën ku ata banojnë është dërguar në bashki. Deri më tani nuk kanë marrë asnjë lajm në lidhje me atë që do të ndodhë.
