Tirana shkon në të 14 pa humbje, duke rrëmbyer fitoren e 13 e njëkohësisht duke fundosur një kundërshtar të rrezikshëm si Laci. Pasi nxorri jashtë loje Partizanin e kurbinasit, tani për bardheblutë kundërshtar për titullin mbetet vetëm Kukësi, gjithnjë nëse Blutë do të dinë të fitojnë nesër në Korcë. Deri atëherë kryeqytetasit mund ti gëzohen 9 pikëve avantazh nga ndjekësi më i afërt.
E të mendosh që deri në minutën e 73 ekipi i Cungut mbajti mirë fushën dhe shfaqi personalitet në fushë, duke e kapur shpesh herë edhe të pavendosur mirë skuadrën vendëse. Takimin e vendosi një episod, kur në korsimin e Dokës, portieri Stazhilla doli në mënyrë katastrofale i duke i dhënë mundësinë Ngo'o të shënojë golin vendimtar. "Ka edhe 10 ndeshje për t’u luajtur - u shpreh Emanuel Egbo pas ndeshjes -. Të vazhdojmë me ndeshjet një e nga një. Shohim punën tonë. Do të bëjmë në fund llogaritë tona".
Pa Nwabueze nuk ka qenë e lehtë për kurbinasit të imponohen në Air Albania, edhe pse Greca bëri mirë në detyrat e dhëna nga Cungu. Ajo që në fakt po bën diferencën në Superiore deri tani është kapaciteti i Tiranës për të shtuar ritmin në fraksionin e fundit të lojës. Skuadra e Egbo është vdekjeprurëse në 10 minutat e fundit me 6 ndeshje në 12 të luajtura në kampionat të vendosura pikërisht atëherë. Por nuk është vetëm kaq, sepse Tirana e 45 minutave të dyta është ajo që duhet patur frikë. 16 në 25 gola të realizuar në total në kampionat nga skuadra e Egbo janë shënuar në 45 minutat e dyta, duke treguar forcën fizike e kualitative të një skuadre, që tani është vështirë të ndalet, sidomos nëse gjërat lihen hapur në pjesën e dytë.
